KHOTBAH MINGGU 29 MARET 2020 – Stola ungu

Minggu Passion VI – Judika : Cidahken kerajangenku bujur o Jahwe!

Invocatio    : Cidahkenlah keleng ateNdu si mbelin, janah kelini kami, ibas adep-adepenNdu terkawal kap kami (Maz. 17:7).

Bacaan       : Zefanya 2:1-3.

Khotbah    : 2 Petrus 1:1-9 

Tema         : Dat bagin ibas kemulian ras kiniulin Dibata.

Minggu peduaken kita “Stay at home, njaga diri, saling menjaga (orang-orang terdekat) anak jabunta.” Kebaktin ibas rumahta sekalak-sekalak, rende ras ertoto kita bagepe megiken Kata Dibata. Pengarapenta pedas min ngadi “maraklesa – virus corona enda, tek kita Tuhan si mereken gegeh ras si ‘ngkawali kita.

Ibas Pustaka Si Badia, kerina sinipadanken/si ijanjiken Tuhan ibas KataNa, labo terjeng sieteh, tapi pe gelah siteki ras sinanami ibas geluhta. Bagem Tuhan terus mpetandaken diriNa, siencidahken keleng ateNa ras encidahken pasu-pasuNa man bangsaNa. Tangkas situhuna labo kai pe sikurang ibas gedang-gedang sejarah geluh kalak Israel. Kerina e inanami erkiteken bangsa e nggit setia, mpelajari ras ngelakoken Pedah Tuhan. Tapi ibas fakta sejarah perdalanen bangsa e megati ka nge la setia, meninggalkan Tuhan, jungut-jungut, tempa mberatsa er-Dibata. Tentu sikap memberontak, alu la nggit ersembah, pasti mpekeke rawa Tuhan sebab Tuhan Dibatanta e, tuhu dem alu perkuah ate, tapi pe adil ras bujur, ikataken pe Tuhan Dibatanta e pecimberu. Tuhan nehken rawana, labo gelah kita bene rasalalap, lang! Tapi tedeh ateNa gelah kita jera, mulih kempak IA si nepa kita. Tuhan mereken kesempatan demi kesempatan gelah rarasenNa banci tetap nggejapken kemulaan ras kiniulinNa. Nuduhken jera (Pertobatan) arus icidahken alu erlebuh, “Cidahken min sikerajangenku bujur o Jahwe” – Sedalanen ras Minggu Passion VI ikataken pe Minggu Judika, gelah kerina kita si enggo tek (anak-anak Tuhan) nggejapken keadilan Tuhan. Gelah rikutken tema enda pe : kita dat bagin ibas kemuliaan ras kiniulin Tuhan.

  • Raja Daud ibas Invocatio, Masmur 17:7, “Cidahkenlah keleng ateNdu si mbelin, janah kelini kami, ibas adep-adepenNdu terkawal kap kami.” Daud ertoto gelah Tuhan tetap mpekena-kena geluhna. Igejapkenna mbue kel kiniseran ras kelaadilen ibas geluhna. Tapi tek ia maka Tuhan ngenca ingan si aman, ingan ernalem ras erpengendes. Si ngasup njagai ras mulahi ibas kebiaren ras aru ate nari, janah Tuhan encidahkensa man kalak si tetap erlebuh man baNa (Maz. 17:7).
  • Bagepe Sepanya, Sepanya 2:1-3, ibas ogenta, sekaligus jadi perenungan man banta, uga sikapta, asum ukumen idalanken erkiteken kita (bangsaNa) la setia? Sialoken kin e desken perligas gelah kita robah guna ngikutken dalan Tuhan? Sikap la mediate, masa bodoh, entah pasrah ibas ngaloken keadaan e, labo sikap si tepat ibas menanggapi/merespons  rawa/ukumen Tuhan. Sepanya ndilo bangsa e gelah jera (Seruan u bertobat), sebab luar biasa ukumen e (ay.2). Dibata pasti ngukum kalak perdosa, tapi adi nggit jera, mulih kempak Tuhan, ngelakoken si benar, janah mpeteruk bana iadep-adepen Tuhan. Lit sada pengarapen pulah ibas ukumen pernembeh ate Tuhan.
  • Arah bahan khotbahta, 2 Pet.1:1-9, Petrus nehken suratna man perpulungen, ikatakenna bali ras ia si enggo dat kengasupen gelah tek man Tuhan Jesus, si enggo mereken dalin terkelin. Kengasupen si tuhu-tuhu meherga, Ertina enda labo gegeh kengasupen manusia, tapi Tuhan Jesus e sendiri nge si enggo mereken kengasupen e. Sekaligus ibas lias ras perkuah ate Dibata, idiloNa pe gelah dat bagin ibas kemuliaan ras kiniulinNa. Ibereken Tuhan pe gegeh ras keperlun guna nggeluh nembah man baNa. Bagem ibas padan perkuah ate Dibata e, mereken kengasupen lako mpersilahang bana (ngasup mulahi diri ibas kerincuhen daging).
  • Ijenda icidahken Petrus pe dinamika kegeluhen kalak si tek man Tuhan Jesus. Labo cukup ikataken aku tek saja, tapi usahakenlah irakut ku kiniteken e kerna kai si mehuli, ertina kiniteken arus teridah ibas perbahanen si mehuli. Irakut ka ku perbahanen si mehuli e, pemeteh kerna Dibata, maka Dibata me ulu perbahanen si mehuli. Adi enggo lit pemeteh kerna Dibata, arus maka irakutndu pemetehndu e penguasaan diri, adi enggo ngasup menguasai diri, irakut ka kuje ate megenggeng, ku ate megenggeng e irakut ka ate tutus er-Dibata, adi enggo tutus ngikutken sura-sura Dibata, rakut ka kuje keleng ate man sapih-sapih Kristen, adi enggo lit keleng ate man sapih-sapih Kristen, emaka rakut ka kuje ate keleng nandangi kerina manusia(2 Petrus 1:5-7).  Ibas ay.8, Petrus mereken penjemba maka enda ndai me biak-biak (karakter) kegeluhen kalak Kristen, kerina enda ndai encidahken terjeng ija kita enggo meteh (nandai) Tuhan Jesus. Tapi adi labo lit biak-biak enda ndai ibas kita kalak Kristen, ertina pentang kap mata perukurenna, ras labo ngasup ngidah Kristus ras kemulianNa, terdauhen labo ingetna pe perkuah ate Tuhan Jesus si enggo mbersihken dosa-dosana.

Pengkenaina : Dat bagin ibas kemulian ras kiniulin Dibata, ibas Minggu Passion VI, Minggu Judika : Cidahkenlah kerajangku bujur o Jahwe.

  1. Tangkas dage man banta tujun kegeluhenta e me guna ngenanami kemulian ras kiniulin Tuhan. Manusia itepa/irancang guna mpermuliaken ras ngenanami persadan ras Tuhan. Ngaloken pasu-pasu Tuhan, nggeluh ibas perseninan sapih-sapih manusia, erdahin, ‘ngkuasai doni ras kerina isina (bd.Kej.1:27-28), la lit ibas rancangen Tuhan kiniseran.
  2. Erkiteken si e, ibas Minggu Judika enda, kita idilo gelah jera ibas biak-biak si la sentudu ras sura-sura Dibata, ikuasai ras engkuasai, penggejapen ulin ras ganjangen kita asa kalak sideban. Ertotolah kita, ibas pengendesen diri man Tuhan, mindo gegeh gelah ngasup kita nggeluh ibas keadilen ras kebenaren.
  3. Khususna ibas paksa enda, kita iperhadapken alu masalah covid-19, rawa Dibata kin enda erkiteken keganjangen ukur manusia? Adi bage kin, marilah kita tunduk ras ertoto gelah rawa Dibata enda pedas ngadi, tetap erlajar kerna keadilen Tuhan.  Tuhu ibas situasi enda, selaku kalak si tek labo kita mbiar mate, tapi ola min mate sia-sia erkiteken lantarta ras mekengta man katanken. Stay at home seturut anjuran kalak si berkompeten, bagepe pemerintahta si berjuang guna mengatasi masalah enda, kita kerjakan keselamatan kita, jaga diri, jaga orang-orang yang kita kasihi, orang-orang terdekat kita. Banci kang jadi waktu sharing, tuhu nge enggo kita berlaku adil, perbulangen man ndehara ras sebalikna, orang tua man anak-anak ras sebalikna, bagepe iuji kita ibas ketedehen ateta man senina ras turangta, rst.
  4. Arah Minggu Judika enda, sehebat asa kai gia gegehna godaan doni enda, kalak si setia ibas kiniteken ras tetap erpengarapen man Tuhan, pasti ngaloken perkuah ate Na, tampil beda, la lit kebanggan geluhta orang yang setia di dalam iman dan berpengharapan kepada Tuhan akan memperoleh kebaikan dan kemurahanNya untuk bisa tampil beda dengan orang lain. Tak satupun yang bisa kita banggakan selain “Hidupku bukannya aku lagi, tapi Yesus yang hidup dalamku”. Serukanlah keadilan kepada Tuhan, agar setiap kita mendapat bagian dalam kemuliaan dan kebaikan Tuhan. Amin.

Pdt. Obet Ginting, S.Th,MA