Kemeriahan Pesta Kerja Rani GBKP Km 8 Medan
Sue ras agenda gerejanta kerna pelaksanaan kerjarani ibas 5 Juli 2026, GBKP Rg. Km. 8 menyambut program enda alu antusias. Ersada arih kerina runggun gereja raduken kerina perpulungen maka pelaksanaan Kerjarani secara Runggun ilakoken i Balai Sibayak II Padang Bulan Medan. Tapi ope pelaksanaan kerjarani secara runggun perlebe ilakoken pelaksanaan kerjarani I terpuk-teruk/PJJ. Pelaksanaan kerjarani Terpuk enda ilakoken ibas bulan Juni 2026. Alu bage kerina terpuk enggo erbahan perayaan Kerjarani i terpuk secara berpariasi. Lit Terpuk si ngelakokenca ibas wari perpulungen jabu-jabu, janah lit ka terpuk ngelakokenca ibas wari sideban baik dalam kota bagepe luar kota, lit deba ermulih bagepe lit ka deba erberngi. Pelaksanaan kerjarani i Terpuk enda jadi sada sarana si mpeturah keakrapen ras keriahen sesame ngawan i terpuk masing-masing. Ibas ibadah kerjarani terpuk enda me iendesken luah kerjarani baik berupa ulih peranin/ulih juma bagepe persembahen siendesken ibas amplop si enggo isikapken i rumah nari. Bageme ibas bulan Juni 2026 enggo kerina terpuk ngelakoken pesta kerjarani
Ibas wari Minggu, 5 Juli 2026 ilakoken ibadah pesta kerjarani secara bersama I Balai Si Bayak II. Acara enda ibenai alu ibadah Minggu si ielai Pdt. Set Perangin-angin M. Th (Kabid Diakonia Moderamen GBKP 2025-2030). Ibas renungen Pendetanta enda mere motivasi alu telkas kerna semangat nehken persembahen man Tuhan. Ngendesken persembahen e labo kita mere man Tuhan, tapi kita ngendeskenca sada bagin pemere sienggo sialoken ibas Tuhan nari. Emaka ula kita mbiar mere man Tuhan, sabab ibas Tuhan nari nge kerina rehna. Kesahta enda pe ia nge punana.
Ibas pelaksanaan Pesta kerjarani enda ilakoken pas bagi kerja kita kalak Karo, ija BPMR rikut ras Pandita rose lengkap bagi semalna kerja kalak Karo, kerina serayan ertanda-tanda, rikut ras perpulungen make busana kukerja-kerja. Bagepe ibas ngendesken luah kerjarani ibahan prosesi perterpuk janah sinjujung luah make busana ragam profesi. Lit polisi, tentara, dokter, ASN, guru, petani ras sidebanna.
Kenca dung acara ibadah ilanjutken makan bersama bagepe imeriahken piga-piga artis sebagai bintang tamu. Kenca elah man ibahan landek bersama siiaturken per Rayon. Ibas acara landek ras rende teridah kepe melala potensi perkolong-kolong ibas gerejanta GBKP. Km. 8. Dilaki ras diberu kerina mejile sorana rende. Janah perlandekna pe mehamat si jadi kesaksin man sekelewet guna kemuliaan Tuhan.
Ibas pelaksanaan kerjarani tahun enda lit terpepulung persembahen buena Rp. 621.324.000. lit peningkaten sekitar 21,65 % asa tahun 2025. Persembahen enda iendesken rikutken aturen keuangen gerejanta, eme 40 % Ku Moderamen GBKP 60% tading i Runggun guna dana penunjang pelayanen gerejanta. Bageme pelaksanaan kerjarani ibas runggunta enggo erdalan alu mehuli dingen tetap Tuhan terpuji. Bujur pe ikataken kami man bandu kerina perpulungen sitetap mendukung kegiaten gerjanta. Bagepe terlebuh man bandu kerina panitia si enggo ngelakoken dahin enda alu mehuli. Tuhan si masu-masu kerina sienggo idahikenndu kekelengen kami si jadi panitia: Pt. Demina Br Sembiring (Ketua), Pt. Oberson Surbakti (Sekretaris), Pt. Jitu Kaban (Bendahara) bagepe kerina panitia si la ibelasken kami sada persada Tuhan si masu-masu kita kerina. Terpujilah gelarNa seh rasa lalap.